Resumen

BAMFO-AGYEI, Emmanuel; THWALA, Didibhuku Wellington  y  AIGBAVBOA, Clinton. Optimisation of labour-intensive productivity for construction projects in Ghana. Acta structilia (Online) [online]. 2023, vol.30, n.1, pp.122-154. ISSN 2415-0487.  http://dx.doi.org/10.38140/as.v30i1.6988.

Die konstruksiebedryf in Ghana is arbeidsintensief en maak staat op die vaardighede van sy arbeidsmag. Geen gekoördineerde beleidsraamwerk is geïmplementeer of ontwikkel om die toepassing van arbeidsintensiewe metodes in Ghana se ontwikkelingsproses te lei nie. Die doel van hierdie artikel is om 'n raamwerk te ontwikkel vir die optimalisering van arbeidsintensiewe produktiwiteit vir konstruksiewerk. Die artikel het 'n kwantitatiewe navorsingsontwerp aangeneem wat 'n vraelysopname gebruik het om die faktore te bepaal wat arbeidsintensiewe produktiwiteit in die Ghanese konstruksiebedryf beïnvloed. Rekords beskikbaar by die Ghana Social Opportunity Project (GSOP) dui aan dat 920 professionele persone betrokke was by arbeidsintensiewe werke aan padinfrastruktuur. 'n Doelgerigte steekproeftegniek is gebruik om 40 distrikte te selekteer wat in padbouprojekte betrokke was; hieruit is 560 respondente oorweeg. Beskrywende en inferensiële statistiek is vir die data-analise gebruik. Hoofasfaktoranalise het ses komponente in die drie arbeidsproduktiwiteitskategorieë met eiewaardes bo 1 aan die lig gebring wat die optimalisering van arbeidsintensiewe produktiwiteit vir konstruksieprojekte in Ghana kan beïnvloed. Dit bestaan uit toerusting en gereedskap, materiaal en temperatuur. Die optimalisering van arbeidsintensiewe produktiwiteit in konstruksiewerke vereis die betrokkenheid van alle belanghebbendes, insluitend projekbestuurders, werkers, verskaffers en subkontrakteurs. Deur die ses komponente in die voorgestelde arbeidsproduktiwiteitsraamwerk te implementeer, kan konstruksieprojekte verhoogde produktiwiteit, kostebesparings en verbeterde uitkomste behaal. Die raamwerk kan beleidmakers in die konstruksiebedryf help om die bestaande nasionale beleid te hersien wat daarop gemik is om inheemse firmas te help om produktiwiteit in die konstruksiebedryf te verbeter.

Palabras clave : Construction; equipment; labour-intensive construction work; labour-productivity framework; material; productivity; temperature.

        · resumen en Inglés     · texto en Inglés     · Inglés ( pdf )